Verdee做竹地板嘅時間差不多廿年，對於竹地板嘅認識係時間、經驗、教訓及汗水嘅累積，鑑於網上有太多唔準確嘅資訊、或者係以訛傳訛嘅誤解，基於專業責任，都要同世界分享一下
1. 竹地板會發黑、生蟲、變形起竹殻？
竹地板係由大髀咁粗嘅毛竹垂直破開，切片或切幼條再拼壓而成。竹係類似西芹咁樣嘅直線纖維草科植物，唔係木材，就算同一個品種嘅竹製造出嚟嘅竹板，質量都可以差天共地。
竹片切咗出嚟需要加工處理，將入面嘅水份調控至合適嘅含水率，適應唔同嘅使用地區環境濕度。
如果竹板發黑，係因為原材料嘅水份根本無處理， 製成嘅地板或者砧板都會由入面開始發黑，質量不合格
由於竹斬出嚟嘅時候都會有竹嘅蟲卵， 就好似菜蟲一樣，原材料都係需要高溫處理殺蟲， 如果處理得唔好，變咗製成品之後，條蟲長大左咪會鑽返出嚟囉，都係唔合格囉
曾經有個師傅同我講，竹地板梗係會起竹殻啦，唔係卦？？？ 變形谷起，又叫「起竹殻」，通常係三個情況出現：
第一： 裝修後漏水問題，地台長時間滲漏水（3/6/9個月都有），物料濕水變形膨脹谷起，或者表面UV油漆巢皮，地板顏色局部變深
第二：安裝手工問題，疏忽需要因應環境疏罅，天然物料有正常熱漲冷縮，一般係一次性漲定，不規則隔幾行預留1-2個卡片位，因應各種情況如地台水氣太重、西斜直照/長期關窗唔通風/長時間蓋保護板（1-3個月）、天台樓下或防火樓層樓上單位等等，會令地板出現較大膨脹嘅情況
第三：原材料質量問題， 呢個係出面最常見，又唔關我事嘅 —- 原材料生產處理唔合格；過度膨脹谷起、或者未安裝已經變形，更嚴重係會爆裂散開
針對以上嘅情況，Verdee維迪竹地板提供15年結構保用
2. 竹地板怕水、怕乾燥？
竹地板都係天然材料，唔可以長時間比水浸泡，或者受到滲漏水都會有影響， 但高密度嘅重壓竹地板耐水性更佳，真係滲漏水，損壞情況都會好過平壓、側壓嘅竹地板好多
如果真係遇到漏水嘅情況都唔需要太擔心，只要將局部損壞嘅地板或底板拆除，就可以換返新嘅地板，維修簡單
至於香港潮濕到好似熱帶雨林咁，真係唔會出現乾燥到板材爆裂嘅情況，加上重壓竹地板密度咁高，長開抽濕機都絕對無問題；當然冷氣長開到直接吹住嘅位置，板材中間嘅縫隙會闊少少架，有需要可用地板專用填縫膠，彈性、防水，可視為地板界嘅補品
相比起其他天然物料嘅地板，竹地板反而係比較耐水及耐乾燥，喺日本韓國更會配合地暖系統使用
3. 竹地板是否防白蟻防蟲？
以往好多人誤解咗話竹地板可以防白蟻，其實唔係呢個意思，重壓竹地板嘅密度係非常之高，入面亦都加咗環保嘅膠合劑；如果遇到白蟻嘅情況，損壞嘅速度同埋嚴重性，會低過其他嘅實木地板好多；大家都必須知道，白蟻係外來嘅昆蟲，如果外牆或者地台有滲漏水，加上適當嘅溫度、濕度、陰暗度，白蟻就會起巢極速生長；所以竹地板同所有實木地板一樣，係絕對不能夠避免白蟻嘅侵蝕
針對以上嘅問題，客戶可以選購我哋公司嘅VOLLER科能鑽石防水地板
一般嘅防蟲問題，如果住宅嘅環境接近山邊，又比較潮濕，裝修嘅期間都會考慮有外來嘅昆蟲匿藏滋生；除此之外，如果裝修期間室內嘅濕氣太重，好容易係會滋生潮濕蟲，通常呢啲衰嘢都會喺腳線背後、或者沿住腳線積聚到濕氣嘅位置，隨住可能肉眼都睇唔見嘅霉菌滋生，吽出黎嘅潮濕蟲，就係食霉菌維生
可以考慮安裝嘅時候係底板加油「蟻油」，環保安全，有效嘅防蟲期間大概係兩至三年；有需要可以安裝嘅時候選購，我哋係有提供加油「蟻油」嘅服務
解決潮濕重嘅問題，首先要解決室內點解咁潮濕嘅問題，最常見嘅係有滲水、或者水泥地台未乾透濕氣太重、又或者住喺防火樓層樓上嘅單位；可以考慮加底板下加購鋪瀝青紙，或者室內保持要多啲開抽濕機啦
4. 竹地板有冇甲醛？
竹地板嘅原材料成本，往往仲平過生產嘅工序，切開一片片或者一束束嘅竹條（唔好以為係打爛攪碎好似木槳板嘅料），需要用膠水將佢哋壓成板材，靚同唔靚嘅膠水成本差別好大， 所以有冇甲醛就好視乎採用嘅膠水是否環保
甲醛本身係無色無臭無味，如果甲醛嘅濃度高，住戶就會覺得刺眼攻鼻、頭暈、甚至作嘔，而甲醛係需要五至八年，喺膠水度散發完畢，先至會完全消散；我成日懷疑啲人話，新屋風水唔好住到病就係甲醛問題
Verdee由第一日做地板開始，就堅持係採用環保嘅膠水，所以我哋嘅地板真係貴少少嘅 SGS嘅甲醛檢測報告結果「ND」，表示Not Detected，甲醛含量係低到檢測唔到
5. 點樣保養竹地板？
要維持竹地板的美觀性及耐用性，建議之保養工序如下:
於玄關位置鋪上地毯以作吸濕及收集鞋子帶進房子的小沙石之用，避免損害竹地板表面。 經常吸塵拖地保持地板表面乾淨，Verdee竹地板以簡單之濕布扭至半乾清潔，清潔地板的同時以乾毛巾擦乾地板，竹地板表面沒有水珠為佳。切勿傾倒清水在地板表面清潔。
如有頑固污漬，用濕布耐心擦淨，如遇特殊情況，或以實木之清潔劑處理，千萬別用可損害地板表面的粗糙刷子。 勿用強力清潔劑清潔竹地板。
可使用地拖清潔竹地板，但竹地板不可泡浸水內。拖地後，地板表面沒有明顯水珠為佳。 如選用地毯，選用不脫色及不損害竹地板表面的物料。
傢俱腳貼上墊子，裝有滾輪的傢俱應換上軟橡膠滾輪，以免損害竹地板表面。 竹地板盡量避免長時間的日曬，以保持顏色一致。
6. 洗唔洗好似木地板咁打蠟？揀邊款油漆嘅竹地板？
竹地板表面油（油漆）主要分為UV型(紫外線固化）油漆或木蜡油（植物油）兩種：
UV型嘅油漆係一層層嘅油漆做8次在地板表面，提供額外硬度、防刮防滑度嘅保護層，耐水耐磨、耐用易打理，唔洗打蠟；可以理解為手機屏幕嘅超薄保護層，有啲客會覺得唔夠自然，會選用我哋TOUCH原觸感系列。
TOUCH原觸感系列採用木蜡油做地板表面處理，係附著性嘅油，即係話磨擦使用會有損耗，但木蜡油都係全啞光嘅，觸感更加天然，色光更柔和，唔反光，突出竹地板物料嘅觸感特色。 家用兩款都合適，商用就建議選用UV型油漆了。
7. 香港近海潮濕地區啱用嗎？
啱用！Verdee重壓竹地板嘅密度極高，唔易吸水受潮、發黑變形，當然家居漏水泡水梗係唔得啦 近海地區我哋都做過晒，完全無問題
*仲未寫完，持續更新...
*Verdee Bamboo Living版權擁有，轉載或引用請標明出處
Comments