網絡世界提供嘅資訊實在係太豐富，好多朋友客戶上網睇咗一啲資訊之後，都會產生各自嘅理解，從而引發好多誤會。
好似我哋之前都成日講，網絡上面好多介紹裝修物料或者安裝技術嘅資訊，其實都有不盡不實嘅，（例如話竹地板易凹易花，咁係唔了解我哋主要賣嘅重壓竹地板係硬過晒實木地板）咁究竟係點解呢？
揸筆嘅人唔係揸工具 ，揸工具嘅人又唔會揸筆，聽完寫出嚟嘅嘢，可能其實係唔完全明白或者誤解咗的；做水泥、做油漆、做地板係唔同科目，唔好成日都話裝修佬點講點講其實好多人係唔識㗎喎，仲要講到好大聲，唔係大聲就是對的
此外就係唔同國家地區，安裝手法同習慣，都會唔一樣；例如台灣、中國同香港安裝地板，都會用唔同嘅方法，呢個就可能係行業傳承工藝嘅問題。
始終師傅安裝，一來同個人手工有關、二來現場環境都好有關，沒有百分百完美的
我哋釘裝重壓嘅竹腳線，必須要注意就係我哋呢個腳線物料非常之硬，要用夠力嘅泵大大力咁打落去，有可能會打爆有明顯嘅釘窿、又可能因為打落去牆身嘅位置咬唔實粒釘，要喺附近位置到加釘固定；所以釘窿一定唔會係固定間距、高度打落去的；由於牆壁不是平整的、地台好多時亦都唔會係絕對平整，腳線接駁位置有可能會有高低，呢啲都需要填膠執整；安裝完腳線之後，就會將釘窿嘅位置執整好先交貨
點為之行業收貨標準？就係室內站立視線水平，望落去沒有明顯嘅釘窿就收貨，絕對唔會近距離放大去評論
如果有一啲工程要求腳線表面無釘窿，可以考慮以下方案： 1. 選用背部掛裝式腳線 2. 選用木製腳線，釘裝後表面執窿，再油上油漆，完美遮蓋 3. 選擇只使用釘膠安裝腳線，一般嘅師傅唔會咁做，原因係釘膠乾好固定之前，腳線會移位，師傅冇可能雙手按實腳線待乾好固定，先再做其他工作，係唔現實嘅做法，所以都要打釘輔助固定
地腳線可以選擇跟地板同色同物料，亦可以選擇跟門框同色的木腳線，亦都有一啲可以收藏電線嘅膠或金屬腳線；客戶安裝地板嘅時候，都可以諗一諗需要點樣嘅腳線
*以上資料由ECO Full Floors - Verdee Bamboo Flooring 提供，如需轉載，請註明出處。
Comments